快周刊 (第297期) 約旦直擊 Edison周杰倫鬥扮嘢

約旦直擊 Edison周杰倫鬥扮嘢

俾你有一億，你會點玩？買樓？買車？Well，太實際喇！「百事」就豪揼一億，包九個港台紅星去被戰火包圍的約旦拍新一輯廣告。

九粒星受人二分四，要勾心鬥角？喺酷熱天氣之下，嘥氣啲啩？不如嘻嘻哈哈玩吓癲吓，打發時間好過啦！講到最癲都莫過於 Edison 同周杰倫鬥扮猩猩馬騮，噢！都係靈長類動物啫。

一向以揼本拍廣告見稱的「百事」，上週日就拉大隊到戰火包圍的約旦，拍攝新一輯的亞太區廣告。

此行共有九位巨星，包括台灣代表 F4、周杰倫及蔡依林；香港代表鄭秀文、郭富城及陳冠希，連工作人員共60多人，浩浩蕩蕩到約旦，進行為期六日的密密做旅程。

周杰倫最得寵

所謂的「密密做」，是由於拍攝時間緊逼，故此眾星除了在到達約旦首日，可以安安樂樂食一餐以外，往後五日均要由天光拍到天黑，冇得唞。

雖然眾星拍攝廣告時，要齊齊等、齊齊拍齊、齊暴曬，看似待遇平等。不過，於籌備工作進行期間，就以周杰倫的駁髮造型最得百事方面宣傳，而且阿 Jay 還可以提供意見，可謂最得寵。

而拍攝現場所見，阿 Jay 常與 Edison 玩埋一堆，二人更興起扮猩猩馬騮打發時間；相反，與傳聞中的「杰倫嫂」蔡依林則冇偈傾，只是偶爾在拍攝時輕扶 Jolin，真係鬼祟得嚟又溫馨！

Sammi 勁欣賞 Jolin

另外，港台天后 Sammi 及 Jolin 亦成為傳媒焦點，儘管有報道指二人鬥性感、冇交流，但 Sammi 對報道只說︰「其實我好欣賞 Jolin，佢性格好似我，好有性格，唔係郁啲就同人 Social！」

談到約旦之旅，最令 Sammi 喜悅的事，她更顯得雀躍地說︰「我哋去死海拍攝嗰陣，買咗好多 Mask，聽人講敷咗啲皮膚會好靚好滑，咪買啲返嚟益吓老友囉！」

嘩！話晒 Sammi 都係護膚品代言人，因住咁講會得失廣告商呀！

一個扮猩猩—一向跳開猩猩舞的 Edison，來個張牙舞爪，嘩！重勁過佢平時呀！

一個扮馬騮—見到 Edison 扮猩猩，阿 Jay 亦不甘示弱，即扮馬騮精，好似冇 Edison 咁繪形繪聲啫。

駁了髮的阿 Jay，站在有四千名約旦臨時演員的 Jerash 古城中，好似好威咁噃！

F4 扮高手—另一邊廂，F4 四子把握時間，在拍攝場地玩個不停，扮晒武林高手，認真大唔透。

城城扮盲公—雖然以人氣嚟計，今日嘅城城絕對唔夠 Edison 同阿 Jay 嚟，但係計扮嘢嘞喎，揸住支盲公竹嘅佢，𠱁得兩個 Hit 爆嘅星咁歡喜，贏晒！

港台天后鬥性感—傳媒的焦點都落在 Sammi 與蔡依林兩位天后的裝束上，不過觀乎二人的豪放度，攤開任影的 Sammi，點都贏到「私私縮縮」遮心口的 Jolin 啦！

緋聞男女周杰倫及蔡依林，刻意保持距離，無私顯見私。

約旦當地氣溫日日過三十度，粒粒巨身熱到汗流浹背，難為朱孝天（右一）要給小演員騎，熱上加熱。

一億包九星—「百事」方面耗資一億拉隊到約旦拍新廣告，最難得就是集齊港、台炙手可熱的九位明星，所以話啫，錢真係萬能㗎！

一停機，化妝師即時為眾星抹汗、補妝，話晒喺酷熱沙漠上，汗混合了沙，影響眾星靚樣嘛。

由於天氣酷熱，F4 的朱孝天及吳建豪，還有被毛巾遮着的蔡依林，即時匿埋唞唞。

拍攝初期，為了避免眾星造型曝光，工作人員用大帳蓬掩蓋眾色，睇到都戥佢哋焗。

西洋人氣王（04 年）—今年初，「百事」請了在西洋樂壇最具人氣的 Enrique Iglesias、Britney Spears、Pink 及 Beyonce Knowles（左至右），拍了一輯以古羅馬作背景的廣告。

球星閃到爆（04 年）—一樣是今年，由托迪、卡路士、碧咸、魯爾及朗拿甸奴（左至右）五位星級球員孭飛，又以古羅馬背景，成為另一輯廣告。

哥哥都玩過—89 年，哥哥「冧莊」作代言人，同年還出了多款以他「嘜頭」製作的廣告商品。

以〈貼身〉作廣告歌，哥哥率先在 88 年成為「百事」代言人。